حفيد فرعون

حفيـــد فرعــــون
المصرى معروف بنباهته
ونكتته ويا فوكاهته
وبرضه مشهور بتفاهته
كدا هو يا سلام
ينصب وسميها شطاره
ويجرى قدامه الحاره
ويبيع أبوه كدا بسجاره
وعاملى همام
الدنيا ماشيه بتتقدم
ودا هوه عايش يتندم
وتمللى قاعد يتمعظم
ببنا الأهرام
رغيفه ياكله برماله
والفقر عيشه ورسماله
والغلب مصمص ف عياله
زى الأيتام
تلاقى واحد بفانله
والتانى متلغمط جله
ومراته شقفه من القله
شبه الأغنام
هيله هيله هيله وهيله يللا
الدنيا طايره بتتعلا
ودا هوه تمام فى الأمبولا
ياكل وينام
أمثال كتيره ومشهوره
مسوده كدا فى الصوره
اللى بيشرب بنوره
وهى هىء تمام
وعيال بتلعب بالكوره
حافيه برجلين مكسوره
والأم تايه ومقهوره
والعيشه سخام
تحبل وتولد بالطوره
شايله وساحبه فـ مقطوره
وتمللى رايحه لدكتوره
تشوف حبله فـ كام
وجوزها كهنة ومتخلع
عاملى طفل ويدلع
الدنيا غاليه وهتولع
وقاضيها غرام
البنت حلوه وحبيبه
مديقه قوى فى الجيبه
وماشيه بتهز الخيبه
ولا عارفه حرام
تطلع من البيت مدهونه
وجوه عفشه ومجنونه
زى البضاعه المخزونه
تاكل وتنام
إفين وإف بقيت مزكوم
كدا من رحيتها بصل على توم
موقع وساخه على الدوت كوم
وجابتلى فصام
والخيبة صبحت بالويبه
ندفع فلوس فى اللعيبه
ودنيا عايبه وغريبه
فيها كله بكام
نسوان بترقص فـ كلبات
ونص قنوات النيل سات
محشيه دايما بالمايوهات
فى غنا وافلام
الرز مش عاجبه بطونا
والفول دا زادنا وزوادنا
واللحمه نسياها عيونا
شوف وصلت كام
يا عم حد يعلمنى
أو بالهداوه يفهمنى
الجهل حاجه هتهبلنى
وناقصنا علام
الدنيا طلعت للمريخ
ولسه عايشبن فـ البطيخ
أساتذه فـ اللوم والتوبيخ
ولا فيش أحلام
----------------------------------------
شعر/ محمد أحمد حسن
أبو مهاود

صديقى اللدود عصفور ها هو العمل قد عاد اليكم
أنتظر اسهامك ولكنى اعتقد اننا قد تناقشنا فيه سويا
ولكن اريد أن تعرض نقدك أمام الجميع حتى يكون الموضوع بين أيدى الجميع
كى نستفيد من نقدك البناء الذى دائما ما يضيف الينا وندرك من خلاله كثيرا مما غاب عنا
فى انتظارك
صديقك اللدود أبو مهاود
شاعر الغلابه